Wednesday, June 2, 2010

ލަންދޫ ސްކޫލުގެ ކިޔެވުން މިދިޔަ އަހަރަށް ވުރެ ރަގަޅު




ލަންދޫ ސްކޫލުގެ މިއަހަރުގެ ފުރަތަމަ ސެމިސްޓާރގެ ރިޕޯޓްފޮތް ދިނުމުގެ ޖަލްސާ މިއަދު ބާއްވައިފިއެވެ. ސްކޫލު ހޯލުގައި މިއަދު ހެދުނު 00؛10ގައި ފެށުނު މިރަސްމިއްޔާތު ކުރިޔަށް ގެންދެވުނީ ހުރިހާ ކުލާހެއް އެއްކޮނެވެ.
މި ޖަލްސާ ފެށުމުގެ ގޮތުން ވާހަކަ ދެއްކެވީ ހެޑް އޮފް ސްކޫލު އަލްފާޟިލް މުހައްމަދު އިބުރާހިމް އެވެ. އެބޭފުޅާގެ ވާހަކައިގައި ކުދިން ޗުއްޓީ ދުވަސްތަކުގެ ބޭނުން ހެޔޮގޮތުގައި ހިފުމަށް ނަސޭހަތްތެރިވެ ވާހަކަފުޅު ދެއްކެވިއެވެ. އެއްކުލާސް ފިޔަވާ ހުރިހާ ކުލާސްތަކަށް ކުރިއެރުން ލިބިފައިވާކަމަށާއި އަދި މިދިޔަ އަހަރު އެވްރެޖަށް ލިބުނު C ރިޕޯޓް ގެ ބަދަލުގައި މިއަހަރު ލިބިފައިވަނީ B ރިޕޯޓްކަން ފާހަގަ ކުރެއްވިއެވެ. މިމަސައްކަތުގައި އެންމެ ބުރަކޮށް މަސައްކަތް ކޮށްދީފައިވަނީ ދެ ސުޕަވައިޒަރުން ކަމުން އެދެބޭފުޅުންނަށް ވެސް ހެޑް އޮފް ސްކޫލު އަލްފާޟިލް މުހައްމަދު އިބުރާހިމް ސުކުރު އަދާ ކުރެއްވިއެވެ.
މިއަހަރު ހާއްސަކޮށް ޓީޗަރުންގެ ކިޔަވައިދިނުމުގެ ފެންވަރު ބަލާ ޗެކުކޮށް ދެ ސުޕަވައިޒަރުން ގެ މަސައްކަތް ރަގަޅު ކަން ފާހަގަ ކުރެވެއެވެ.

މިޖަލްސާގައި ދެ ސުޕަވައިޒަރުންވެސް ވަނީ ވާހަކަ ދައްކަވާފައެވެ. ސުޕަވައިޒާރ މޫސާ ހުސެއިންގެ ވާހަކާގައި މިއަހަރު މިކާމިޔާބު ލިބުނީ ބެލެނިވެރިން ނިންމި ހެޔޮ ނިންމުމުގެ ސަބަބުން ކަމުގައެވެ. އަދި ކުދިން ޗުއްޓީ ދުވަސްތަކުގެ ބޭނުން ހެޔޮގޮތުގައި ހިފުމަށް ހޮލިދޭ އެސައިންމެންޓް ތައް ހެއްދުމަށް ވެސް ބެލެނިވެރިންނަށް ނަސޭހަތްތެރިވެ ވާހަކަފުޅު ދެއްކެވިއެވެ. މީގެ އިތުރުން ކުދިންގެ ލިޔުމުގެ ހުނަރު އިތުރު ކުރުމަށްޓަކައި ކޮންމެ ދުވަހަކު އެކުދިންގެ ދުވަސް ހޭދަކުރިގޮތުގެ ޑައިރީ އެއްލިޔުމަށް ކުދިންނަށް ނަސޭހަތްތެރިވިއެވެ.
ސުޕަވައިޒާރ އަހުމަދު ދާއޫދުގެ ވާހަކަގައި ބޭރުގެ މާއްދާތަކުން ކުދިން ދައްކަމަށާއި އަދި ބޮޑަށް ދައްވެފައިވަނީ ޑިސިޕްލީން މައްސަލަތަކުގައި އިދާރާއަށް ގެނެވިފައިވާ ކުދިން ކަމުގައިވެސް ފާހަގަ ކުރެއްވިއެވެ.
ސްކޫލާއި އެއްގޮތަށް ކުއްޖާ ދިރިއުޅޭ ގެއަކީވެސް އުނގެނުމުގެ މާހައުލަކަށް ހަދަންޖެހޭ ކަމަށެވެ. އަދި މިއަހަރު ތެރޭގައި ކުދިން ކިޔެވި ފިލާވަޅުތައް ޗުއްޓީތެރޭގައި ކުދިން ލައްވައި މުތާލިއާ ކުރުމަކީ ވަރަށް މުހިއްމުކަމެއްކަން ފާހަގަކުރެއްވިއެވެ.
މިޖަލްސާގައި ވަނީ އޭ ރިޕޯޓް ލިބުނު ދަރިވަރުންނަށް ސުޓޭޖް މަތިން ފޮތް ދޫކޮށްފައެވެ. ލަންދޫ ސުކޫލު އަންނަނީ މިދިޔަ އަހަރަށް ވުރެ ހުރިހާ ކަމެއްގައިވެސް ކުރި ހޯދަމުންނެވެ. އެއީ މިހާރު ހުންގާނުގައި ހުންނެވި ކެޔޮޅުގެ ހިތްވަރާއި ރޭވުން ކަމާއި މެދު އަޅުގަނޑު ސައްކެއް ނުކުރަމެވެ. އަދި ކައިރީގައި ތިބި ފަޅުވެރިން ގެ މަސައްކަތް ކަން ޔަގީނެވެ. މާތް ﷲ ލަންދޫ ސުކޫލަށް އެއްދުވަހުން އަނެއް ދުވަހަށް ކުރިއެރުން ދެއްވާން ދޭވެ. އާމީން.



Digg Google Bookmarks reddit Mixx StumbleUpon Technorati Yahoo! Buzz DesignFloat Delicious BlinkList Furl

0 ޚިޔާލު: on "ލަންދޫ ސްކޫލުގެ ކިޔެވުން މިދިޔަ އަހަރަށް ވުރެ ރަގަޅު"

Post a Comment

މިލިޔުމަށް ޚިޔާލު ދެއްވާ